Photobucket

Saturday, November 19, 2011

မလေးရှားအား ရှုံးနိမ့်ခဲ့၍ မြန်မာအသင်း ဗိုလ်လုပွဲနှင့် လွဲချော်

                                                                             
ယနေ့ ညနေပိုင်းက ယှဉ်ပြိုင် ကစားခဲ့သည့် မြန်မာနှင့် မလေးရှား တို့၏ ဆီမီးဖိုင်နယ် ပွဲစဉ်တွင် မလေးရှား အသင်းက (၁-၀)ဖြင့် အနိုင်ရရှိ ခဲ့ကာ ဗိုလ်လုပွဲသို့ တက်ရောက် နိုင်ခဲ့ပြီး မြန်မာ အသင်းမှာမူ တတိယ နေရာလုပွဲနှင့်သာ ကျေနပ် ခဲ့ရသည်။

ပွဲစသည်နှင့် မြန်မာအသင်းက မလေးရှာ အသင်းဘက်သို့ ဖိအားပေး ကစားရန် ကြိုးပမ်းခဲ့ပြီး မလေး နောက်ခံလူများ ကြံ့ကြံ့ခံ ဖျက်ထုတ် နေခဲ့သည်။ ပွဲချိန် (၃)မိနစ်တွင် မလေးရှား အသင်း ထိုးစစ်ဆင်ရာ ပြိုင်ဘက် တိုက်စစ်မှူး အမှတ်မထင် လွတ်ထွက် သွားရာ သီဟစည်သူ အနာခံ ထွက်တားခဲ့ပြီး လျှံထွက်လာသည့် ဘောလုံးအား နောက်တွင် အသင့်ပါသည့် မလေးရှား ကစားသမား အသာ ကန်သွင်းချက်ကိုလည်း သီဟစည်သူပင် ကာကွယ် နိုင်ခဲ့၍ မြန်မာတို့ ကံကောင်းခဲ့သည်။

ပွဲချိန် (၇)မိနစ်တွင် မြန်မာတို့ ပထမဆုံး ထောင့်ကန်ဘော ကန်ခွင့်ရခဲ့ပြီး ကျော်ဇေယျာဝင်း ကန်တင်ပေးသည့် ဘောလုံးအား ကြည်လင်း ခေါင်းတိုက် ချပေးခဲ့ သော်လည်း မြန်မာ တိုက်စစ်မှူး မပိတ်သွင်းမီ မလေးရှား နောက်ခံလူ ဖျက်ထုတ် သွားခဲ့သည်။ ထို့အတူ ပွဲချိန် (၁၀)မိနစ်တွင် မြန်မာတို့ ဒုတိယအကြိမ် ထောင့်ကန်ဘော ကန်ခွင့် ရခဲ့ပြီး နောက်ခံလူ ရှင်းထုတ်ရာမှ မြန်မာ ကွင်းလယ်လူ ကန်သွင်း ခဲ့သော်လည်း နောက်ခံလူ ထိထွက်ခဲ့သည်။ ထုိ့နောက်တွင် မြန်မာအသင်း ထိုးစစ်ဆင်ရာ ကျော်ကိုကို လွတ်ထွက် သွားသော်လည်း နောက်ခံလူ ဖျက်ထုတ် သွားခဲ့၍ ထောင့်ကန်ဘောသာ ထပ်ရခဲ့သည်။ ပွဲချိန် (၁၀)မိနစ်ကျော် သည်အထိ မြန်မာအသင်းက တောက်လျှောက် ဖိကစားနေခဲ့ပြီး မလေးရှား အသင်းက မြန်မာအသင်းအား တန်ပြန် ထိုးစစ်ဆင်ရန်သာ ချောင်းကစား နေခဲ့သည်။ (၁၃)မိနစ်တွင် ကျော်ဇေယျာဝင်းအား မလေးရှား ကွင်းလယ်လူ အဖျက်ကြမ်း ရာမှ မြန်မာတို့ ဖရီးကစ် ကန်ခွင့်ရခဲ့ပြီး ယင်း ဖရီးကစ်အား ကျော်ဇေယျာဝင်းပင် ကန်သွင်းခဲ့ရာ နောက်ခံလူ ထိထွက်ခဲ့သည်။ ထို့နောက်တွင် ရန်အောင်ဝင်း ဧရိယာ အပြင်မှ ကန်သွင်းရန် ကြိုးပမ်းချက် ကန်ချက်ပျော့ကာ ဂိုးသမား အလွယ်တကူ ဖမ်းနိုင်ခဲ့သည်။
ပွဲချိန် (၁၅)မိနစ်ကျော်တွင် မလေးရှား အသင်းက ကွင်းလယ်ကို ပြန်လည် စိုးမိုးလာခဲ့ပြီး မြန်မာ နောက်တန်းအား ထိုးဖောက်ရန် ကြိုးပမ်းခဲ့သည်။ သို့သော် နှစ်သင်းစလုံး ကွင်းလယ်တွင်သာ အပျက်များ နေခဲ့သည်။ ပွဲချိန် (၂၃)မိနစ်တွင် ပြည့်ဖြိုးဦးအား မလေး နောက်ခံလူ လမ်းကြောင်းပိတ် ခဲ့၍ မြန်မာတို့ ဘယ်ခြမ်းမှ ဖရီးကစ် ကန်ခွင့်ရခဲ့ပြီး ကျော်ဇေယျာဝင်း ကန်ချက် မလေးရှား ဂိုးသမား ဖမ်းမိခဲ့သည်။ (၂၄)မိနစ်တွင် မလေးရှား အသင်း မြန်မာနောက်တန်းအား ခြိမ်းခြောက်မှုများ ပြုလုပ် လာခဲ့ပြီး နောက်ခံလူများ အလုပ်ရှုပ် နေခဲ့ရသည်။

(၃၅)မိနစ်တွင် မလေးရှား တိုက်စစ်ဆင်မှုအား တားဆီးရာမှ ဇော်မင်းထွန်း အနည်းငယ် ဒဏ်ရာရရှိ ခဲ့ပြီး မလေးရှား အသင်းက (၂၅)ကိုက် အကွာခန့်မှ ဖရီးကစ် ကန်ခွင့်ရသည်။ ယင်းဖရီးကစ်အား မလေးရှား ကွင်းလယ်လူ ကန်ချက် အတော်လေး သေသပ် လှပသော်လည်း ဂိုးဘေး ကပ်ထွက်သွား၍ မြန်မာတို့ သက်သာခဲ့သည်။ မိနစ် (၄၀)တွင် ညာခြမ်းမှ ထိုးဖောက်ရာမှ ကြည်လင်း ဂိုးရှေ့ ဖြတ်တင်ပေးမှု ကောင်းမွန် သော်လည်း နောက်ခံလူ ဖျက်ထုတ် သွားခဲ့သည်။ ပွဲချိန် (၄၃)မိနစ်တွင် မလေးရှား အသင်း ထိုးဖောက်မှု မြန်မာတို့ အသည်းအသန် ခုခံ ခဲ့ရပြီး (၄၃)မိနစ်တွင် မြန်မာတို့ မလေးရှား ဂိုးဧရိယာ အပြင်နားတွင် ဖရီးကစ် ကန်ခွင့်ရခဲ့သည်။ ယင်း ဖရီးကစ်အား ကျော်ကိုကို တိုက်ရိုက် ကန်သွင်းခဲ့ သော်လည်း နောက်ခံလူ ထိထွက်ခဲ့သည်။ (၄၆)မိနစ်တွင် ရွှေလှိုင်ဝင်း တန်ပြန် ထိုးစစ်ဆင် သည်အား မလေးရှား နောက်ခံလူ အဖျက်ကြမ်း၍ အ၀ါကတ်ပြ ခံခဲ့ရပြီး ပြစ်ဒဏ်ဘော ကန်ချက်မှာလည်း နောက်ခံလူ ဖျက်ထုတ် နိုင်ခဲ့၍ ပထမပိုင်း အပြီးတွင် မြန်မာနှင့် မလေးရှားတို့ ဂိုးမရှိ သရေသာ ဖြစ်နေခဲ့သည်။

ဒုတိယပိုင်း ပြန်စသည်နှင့် မလေးရှား အသင်းက တိုက်စစ်ဖွင့် ကစားလာခဲ့ပြီး မြန်မာ နောက်ခံလူ များအား ဖိအား ပေးခဲ့သည်။ (၄၉)မိနစ်တွင် ကြည်လင်း ညာခြမ်းမှ ထိုးစစ်ဆင် ရာမှ မြန်မာတို့ ထောင့်ကန်ဘော ကန်ခွင့် ရခဲ့သည်။ သို့သော် ထောင့်ကန်ဘော ကန်ချက် နောက်ခံလူများ ဖျက်ထုတ် နိုင်ခဲ့သည်။ မြန်မာနှင့် မလေးရှား တို့သည် ဒုတိယပိုင်း ပြန်အစတွင် တိုက်စစ်အား ပိုမို လိုက်ပါ ကစားခဲ့ကြပြီး ဂိုးရရှိရေး ပိုမို အားထုတ် လာခဲ့သည်။ ပွဲချိန် (၅၇)မိနစ်တွင် မြန်မာ နောက်ခံလူ ဇော်ဇော်ဦး ခေါင်းကွဲ သွားခဲ့၍ ကွင်းလယ်လူ ရန်အောင်ကျော်နှင့် လူစားလဲ ခဲ့ရသည်။ ထို့ကြောင့် အသင်းခေါင်းဆောင် အေးဆန်း နောက်တန်းသို့ ဆင်းကစား ခဲ့ရသည်။

မိနစ် (၆၀)တွင် မလေးရှား အသင်း ဘယ်ခြမ်းမှ ထိုးဖောက်မှုမှ တစ်ဆင့် ဂိုးရရန် နီးစပ်ခဲ့ပြီး ဂိုးသမား သီဟစည်သူနှင့် အေးဆန်းတို့ အသည်းအသန် ဖျက်ထုတ် ခဲ့ရသည်။ မလေးရှား အသင်းသည် ၎င်းတို့၏ ထိုးစစ်အား ရပ်တန့်ခြင်း မရှိဘဲ တရစပ် ထိုးစစ်ဆင် နေခဲ့ရာ မြန်မာ နောက်ခံလူများ အလုပ်များ နေခဲ့ရသည်။ (၆၄)မိနစ်တွင် ရန်အောင်ကျော် ဘယ်ခြမ်းမှ ထိုးပေးသည့် ဘောလုံးအား ကျော်ကိုကို ကန်သွင်းချက် မင်းမင်းသူ အသာ ပိတ်သွင်းခဲ့ သော်လည်း မလေးရှား ဂိုးသမား အစွမ်းပြ ကာကွယ် သွားခဲ့၍ မြန်မာအသင်း အပိုင် ဂိုးသွင်းခွင့် တစ်ကြိမ် နစ်နာခဲ့ရသည်။ (၆၅)မိနစ်တွင် မြန်မာ အသင်းက ပြည့်ဖြိုးအောင် နေရာတွင် အောင်မြင့်အေးအား ၀င်ရောက် ကစားစေခဲ့သည်။ (၆၇)မိနစ်တွင် မြန်မာတို့ မလေးရှား ဂိုးဧရိယာ အပြင် အစပ်မှ မြန်မာတို့ ဖရီးကစ် ကန်ခွင့်ရခဲ့သည်။ ယင်း ဖရီးကစ်အား ကျော်ဇေယျာဝင်း ကန်ခဲ့ရာ တံတိုင်း မကျော်ခဲ့ဘဲ ထောင့်ကန်ဘောသာ ဖြစ်ခဲ့သည်။ ထို့နောက်တွင် ရန်အောင်ဝင်း ဧရိယာ အပြင်မှ အပြင်းကန်ချက် ပြင်းထန် လှပသော်လည်း ဘေးကပ်ထွက် သွားခဲ့သည်။

(၇၃)မိနစ်တွင် မလေးရှား အသင်း ပြစ်ဒဏ်ဘောမှ တစ်ဆင့် ခေါင်းတိုက် အဆုံးသတ်ချက် ကောင်းမွန် သော်လည်း ဂိုးဘေး ကပ်ထွက် သွားခဲ့၍ မြန်မာတို့ သက်သာခဲ့သည်။ (၇၇)မိနစ်တွင် မြန်မာတို့ နှစ်ကြိမ်ဆက်တိုက် ထောင့်ကန်ဘော ရခဲ့သော်လည်း အခွင့်အရေး မရခဲ့ပေ။ (၇၈)မိနစ်တွင် မလေးရှား ရှေ့တန်းလူ အပိုင် ပိတ်သွင်းခွင့် တစ်ကြိမ် ရခဲ့သော်လည်း အပေါ်ထောင် သွားခဲ့သည်။ ပွဲချိန် (၈၅)မိနစ်တွင် မလေးရှား အသင်း ဘယ်ခြမ်းမှ ဖြတ်တင်ဘောမှ တစ်ဆင့် နောက်မှ လိုက်ပါလာသည့် ကစားသမား အပိုင် ပိတ်သွင်းခဲ့ရာ မလေးရှားအသင်း ဦးဆောင် အဖွင့်ဂိုး စတင် ရရှိ သွားခဲ့သည်။ ထို့နောက်တွင် မြန်မာ အသင်းက ချေပဂိုး ပြန်လည် ရရှိရေး ကြိုးပမ်း လာခဲ့ပြီး ကျော်ဇေယျာဝင်း နေရာတွင် အရန် တိုက်စစ်မှူး မင်းမင်းထွန်းအား ၀င်ရောက် ကစား စေခဲ့သည်။ ထို့နောက်တွင် နာကျင် အချိန်ပို (၃)မိနစ် ဆက်လက် ကစားခဲ့ရကာ (၉၁)မိနစ်တွင် ရန်အောင်ကျော် ဘယ်ခြမ်းမှ ထိုးဖောက်ရာမှ ထောင့်ကန်ဘော ရရှိခဲ့သည်။ သို့သော် ယင်း ထောင့်ကန်ဘော မှတစ်ဆင့် မြန်မာတို့ လိုအပ်နေသည့် ချေပဂိုး ရရှိခဲ့ခြင်း မရှိဘဲ မလေးရှား အသင်းက (၁-၀)ဖြင့် အနုိုင်ရရှိ ခဲ့သည်။ ထိုရလဒ်ကြောင့် မြန်မာအသင်းသည် ၎င်းတို့၏ မျှော်လင့်ချက် ဖိုင်နယ်သို့ တက်ရောက်နိုင်ခြင်း မရှိခဲ့ဘဲ တတိယ နေရာလုပွဲ သို့သာ တက်လှမ်း နိုင်ခဲ့သည်။ လက်ရှိ ချန်ပီယံ မလေးရှား အသင်းမှာမူ ဗီယက်နမ် - အင်ဒိုနီးရှား တို့၏ ပွဲစဉ်မှ အနိုင်ရသည့် အသင်းနှင့် ဗိုလ်လုပွဲတွင် ရင်ဆိုင်ရမည် ဖြစ်သည်။

ရောက်လာသူအပေါင်းရွှင်လန်းချမ်းမြေ့ကြပါစေ..ရွှေဝန်းရတနာ..(၁၉.၁၁.၁၁)စနေနေ့

No comments:

Post a Comment